सिन्धुपाल्चौक । सिन्धुपाल्चोकको पाँचपोखरी गाउँपालिकाले कोरोना भाइरस (कोभिड–१९) को संक्रमण फैलन नदिन खाद्य वस्तुको आपूर्ति सकभर बाहिरबाट नगर्ने रणनीति बनाएको छ ।
स्थानीय उत्पादनलाई परिचालन गरी खाद्यन्न परिपुर्ति गर्ने योजना अनुसार गाउँपालिकाले खाद्यन्न प्रवेशमा रोक लगाएको पालिकाका अध्यक्ष टासी लामाले जानकारी दिनुभयो । स्थानीय जनताले हामी जे जस्तो छ त्यही खाएर बाँच्छौ खाद्य तथा मासुजन्य सामाग्री भित्रदाँ जोखिम वढ्ने बताएपछि यस्तो निर्णय गरेको उहाँले बताउनुभयो ।
स्थानीयले पालिका सीमानामा कडाई गर्न आग्रह गरेपछि हेल्थ डेक्स निर्माण गरि सीमा प्रवेशमा कडाइ गरिएको लामाले जानकारि दिनुभयो । बस्तीबस्ती छिर्ने सडक र गोरेटोमा पनि निगरानी बढाएको उहाँले बताउनुभयो ।
खाद्यवस्तु आयात गर्दा रोग भित्रन सक्ने भन्दै गाउँकै खाद्यान्न, तरकारी र मासुको प्रयोग गर्ने नीति बनाएको हो । जिल्लाको विकट हिमाली क्षेत्रको रुपमा चिनिने पाँचपोखरी थाङ्पाल गाँउपालिकाले कोरोना भाइरस संक्रमणविरुद्ध महत्वपूर्ण योजना कार्यान्वयनमा ल्याएको पनि बताएको छ ।
‘बाहिरबाट आउनेलाई विशेष निगरानीमा राखिएको छ ।’ पालिका प्रमुख लामाले भन्नुभयोे, ‘विदेशबाट गााउपालिका भित्रने प्रत्येकको घरमा पुगेर स्वास्थ्य जाँच गरिएको छ ।’ उहाँले दीर्घरोगीलाई घरमा औषधि पुर्याउने काम गाँउपालिकाले सुरु गरेको पनि उल्लेख गर्नुभयो ।
‘विदेशबाट आउनेको लगत संकलन गर्यौँ र उनीहरुको परिवारलाई समेत विषेश निगरानीमा राख्यौँ ।’ लामाले भन्नुभयो । उनीहरुको स्वास्थ्य जाँचका लागि जनप्रतिनिधि, स्वास्थ्यकर्मी र औषधिसहित घर–घरमा पुगेका छन् ।
स्थानीयस्तरमा २० बेडको क्वारेन्टाइन निर्माण गरिएको छ । तर त्यहाँ अहिलेसम्म कोही बसेका छैनन् । तिपेनीको क्षेत्रपालेश्वरीमा २० बेडको क्वारेन्टाइन निर्माण गरेता पनि गाउँपालिकाले क्षेत्रीय क्वारेन्टाइनलाई विषेश प्राथमिकता दिएको छ ।
सुरक्षा, स्वास्थ्यकर्मी र स्वास्थ्य सामग्रीको हिसाबले मेलम्चीमा बन्ने क्षेत्रीय क्वारेन्टान नै उपयुक्त हुने पालिका प्रमुख लामाको विश्वास छ ।
विपद् परास्त गर्न सबै मिलेर लड्नुपर्ने भएकाले राजनीतिक दलबीच पनि सहकार्य जरुरी रहेको उहाँले बताउनुभयो। सचेतना कार्यक्रम चलाउँदै फ्रन्टलाइनमा रहेका स्वास्थ्यकर्मीको परिचालनलाई विशेष प्राथमिकतामा राखिएको छ ।
स्वास्थ्य चौकी छेउछाउको चोक–चोकमा औषधि छर्किएको छ । गापाभित्र आठवटा स्वास्थ्य चौकी, ६ वटा वर्थिङ सेन्टर, दुइ वटा स्वास्थ्य युनिट र मानेखर्कमा चिकित्सकसहितको स्वास्थ्य संस्थाले अहोरात्र काम गरेको पालिकाले जनाएको छ ।
प्रकाशित मिति: मंगलबार, वैशाख १६, २०७७, ११:४३
