सिन्धुपाल्चोक । चीनको केन्द्र सरकारले तत्काल सञ्चालनमा ल्याउन स्थानीय प्रशासनलाई निर्देशन दिएपछि बन्द भएको तातोपानी नाका खुल्ने भएको छ ।
कोभिड–१९ महामारीसँग जुध्न नेपाललाई चाहिने अत्यावश्यक स्वास्थ्य तथा खाद्यान्नका सामग्री पठाउन नाका सञ्चालनमा ल्याउन चीन सरकारले निर्देशन दिएको हो ।
उद्योग, वाणिज्य तथा आपूर्ति मन्त्रालयका अनुसार चीनले आफ्नो स्थानीय प्रशासनलाई उक्त निर्देशन दिएको हो । सिन्धुपाल्चोकका प्रमुख जिल्ला अधिकारी उमेशकुमार ढकालले आवश्यक समन्वय गरी नाका सञ्चालन गरिने जानकारी दिनुभयो ।
वुहान सहरबाट कोभिड–१९ फैलिन सुरू भएपछि तीन महीना चीनले सबै अन्तर्राष्ट्रिय नाका बन्द गरेको थियो । चीन सरकार नै अग्रसर भएर नाका सञ्चालन गर्न लागेको उद्योग, वाणिज्य तथा आपूर्ति मन्त्रालयले जानकारी दिएको छ।
वाणिज्य सचिव डा. बैकुण्ठ अर्यालले भन्नुभयो, ‘चीनले आफ्नो स्थानीय प्रशासनलाई नाका छिटो सञ्चालनमा ल्याउन निर्देशन दिइसकेको छ ।’
तातोपानी नाकाका भन्सार प्रमुख लालबहादुर खत्रीले चीनतर्फको भन्सार सुचारु गर्न निर्देशन भइसकेको जानकारी पाएको बताउनुभयो । चिनिया टोलीले अबको केही दिनमा कार्य योजना बनाउने र नेपाललाई छलफलमा बोलाउने सम्भावना रहेको उहाँको भनाइ छ ।
प्रकाशित मिति: बुधबार, चैत २६, २०७६, ०६:४७
