काठमाडौं । प्रदेश नम्बर १ कै पहिलो सामुदायिक रेडियो सोलु एफ.एममा आगलागी भएको छ । एफएमको स्टुडियोमा गएराती आगलागी भएको हो ।
सोलुखुम्बुको सोलुदुधकुण्ड नगरपालिका ६ दोर्पुबजारबाट सञ्चालित उक्त रेडियोको स्टुडियोमा गएराती करिब १२ : ३० बजे आगलागी भएको हो ।
स्टुडियोबाट सुरु भएको आगोले रेकडिङ सहित भवन समेत जलेर नष्ट भएको रेडियो सञ्चालक समितिका अध्यक्ष बुद्धि नारायण श्रेष्ठले जानकारी दिनुभयो । आगलागीबाट करिब एक करोड रुपैयाँ बराबरको क्षति भएको प्रहरीको अनुमान छ ।
विद्युत सर्ट भएर आगलागी भएको अनुमान गरिए पनि यकिन कारण खुल्न सकेको छैन ।
नगरपालिकाको दमकल, सशस्त्र प्रहरी, नेपाल प्रहरी, नेपाली सेना, स्थानीयबासी, रेडियोका कर्मचारी लगायतको सहयोगमा आगो करिब २ घण्टापछि नियन्त्रणमा आएको थियो ।
वि.सं. २०६१ सालमा स्थापना भएको सोलु एफ.एम. हाल एक हजार वाट क्षमतामा प्रसारण भईरहेको थियो ।
प्रकाशित मिति: सोमबार, फागुन १७, २०७७, ०६:५९
