काठमाडाैँ । नेपाल विद्युत प्राधिकरणले विद्युत संरचना खम्बा, लाइन आदि प्रयोग गरेबापतको बक्यौता तिर्न इन्टरनेट तथा टेलिभिजन सेवा प्रदायकहरुलाई निर्देशन जारी गरेको छ।
प्राधिकरणले बैशाख १ गते जारी गरेको सुचनामा लामो समयदेखि विद्युत संरचना प्रयोग गरे वापतको भुक्तानी नगरेका कारण बक्यौता रकम बढ्दै गएको उल्लेख गरिएको छ।
अब तोकिएको समयभित्र शुल्क नतिरे सेवा अवरुद्ध हुन सक्ने प्राधिकरणले चेतावनी दिएको छ।
सूचनाअनुसार, धेरै सेवा प्रदायकहरूले नेपाल विद्युत प्राधिकरणको पूर्वस्वीकृति बिना वा सम्झौता नवीकरण नगरी संरचना प्रयोग गरिरहेका छन्। साथै, केहीले नियमित शुल्क तिरेका छैनन्। यसले गर्दा प्राधिकरणको राजस्वमा असर परेको मात्र होइन, व्यवस्थापनमा पनि चुनौती थपिएको उल्लेख छ ।
प्राधिकरणले सेवा प्रदायकहरूलाई पटक पटक जानकारी गराउँदै आएको भए पनि अपेक्षित प्रतिक्रिया नआएको जनाएको छ। विद्युतका खम्बा र संरचना केवल बिजुली वितरणका लागि मात्र नभई अहिले डिजिटल सेवाका लागि पनि प्रयोग भइरहेका छन्। कतिपय तारहरु छरपष्ट र जेलिएका कारण सहरको सुन्दरतामा समेत असर परिरहेको छ ।
प्राधिकरणले तोकेको समयसीमा भित्र सेवा प्रदायकहरूले बक्यौता तिर्ने वा सम्झौता नवीकरण नगर्नेको सेवा काटिने स्पष्ट निर्देशन जारी गरेको छ । तर कहिले सम्म तिर्ने स्पष्ट मिति भने तोकिएको छैन ।
प्रकाशित मिति: शुक्रबार, वैशाख ११, २०८३
