यस वर्ष लम्पी स्किन रोगका कारण देशभर २० हजार ७२४ गाईभैँसी संक्रमित भएका छन्।
पशु सेवा विभागका अनुसार संक्रमितमध्ये १२ हजार ३०२ वटा पशु उपचारपछि निको भएका छन् भने ७ हजार ८६६ अझै सक्रिय संक्रमित रहेका छन्।
रोगका कारण हालसम्म ५ सय ५६ गाईभैँसी मरेको विभागले जनाएको छ।
लम्पीका कारण कोशी, मधेश, बागमती र गण्डकी प्रदेशमा सबैभन्दा बढी क्षति भएको छ। रुपन्देही, नवलपरासी, चितवन, मकवानपुर, धनुषा, सप्तरीलगायत जिल्लामा रोगको प्रभाव उच्च देखिएको छ।
भोजपुर, सङ्खुवासभा, धनकुटा, ओखलढुंगा, खोटाङ, ताप्लेजुङ, पाचथरलगायतका जिल्लामा लम्पी रोग फैलिएको छ भने मधेश र लुम्बिनीका धेरै जिल्लामा समेत संक्रमण देखिएको छ। विभागकाअनुसार रोग नियन्त्रणका लागि हालसम्म ११ लाख ५२ हजार ६२५ मात्रा खोप वितरण भइसकेको छ । अझै दुई लाखभन्दा बढी मात्रा प्रयोग गर्न बाँकी छ।
खोप लगाउनको लागि नजिकैको पशु सेवा केन्द्र वा पालिकाको शाखामा सम्पर्क गर्न विभागका महानिर्देशक डा.रामनन्दन तिवारीले सीआईएनसँग बताउनुभयो ।
लम्पी स्किन रोगका कारण कोशी प्रदेशमा मात्रै १ दशमलब ०१ अर्व आर्थिक नोक्सानी भएको अनुमान गरिएको छ। हाल कोशी प्रदेशका १० जिल्लामा उक्त रोग फैलिरहेको छ। पशुमा मृत्यदर भने २ दशमलब ७ प्रतिशत देखिएको छ। रोग अहिले नियन्त्रणमा रहेको पशुपन्छी तथा मत्स्य निर्देशनालयका निर्देशक डा. शुसिल कुमार अधिकारीले वताउनु भएको छ।
प्रकाशित मिति: शनिबार, साउन १७, २०८२
