काठमाडौं । सरकारले जथाभावी ग्रामीण सडक नखन्न स्थानीय सरकारहरुलाई अनुरोध गरेको छ । राम्रो अध्ययन बिना खनिने त्यस्ता सडकले ठूला राजमार्गलाई असर गरेको भन्दै सरकारले यसतर्फ सचेत हुन आग्रह गरेको हो ।
मुख्य राजमार्ग माथिका डाँडामा खनिएका शाखा सडकका कारण विशेषतः वर्खाको समयमा पहिरोले मुख्य ठूला राजमार्ग रोकिएको भन्दै सडक विभागले जथाभावी सडक खन्ने काम रोक्न आग्रह गरेको हो ।
सीआईएनसँग कुराकानी गर्दै सडक विभागका उप–महानिर्देशक शिवहरी सापकोटाले सडक खन्नुपूर्व इन्जिनियरसँग सल्लाह गरेर र सडक विभागलाई एकपटक सोधेर मात्रै काम अगाडी बढाउन आग्रह गर्नुभयो ।
मुख्य राजमार्ग माथिका डाँडामा खनिएका शाखा सडकका कारण विशेषतः वर्खाको समयमा पहिरोले मुख्य ठूला राजमार्ग रोकिएको भन्दै सडक विभागले जथाभावी सडक खन्ने काम रोक्न आग्रह गरेको हो ।
सापकोटाले भन्नुभयो, ‘स्थानीय तहबाट बनाइएका, उपभोक्ता समितिहरुबाट खनिएका, त्यस्ता सडकले अहिले राष्ट्रिय राजमार्गलाई पनि बिगार गरेको छ । माथि सडक खनिएको छ, तल राजमार्ग हुन्छ । माथिको पहिरो सबै तल राजमार्गमा आएर लेदो बसिरहेको हुन्छ, त्यसले गर्दा पनि राजमार्ग अवरुद्ध भएको छ ।’
सापकोटाले अगाडी भन्नुभयो, ‘राजमार्ग भनेको त लाइफलाइन हो, भोली विरगञ्जबाट काठमाडौं आउने ट्रक, दश ठाउँमा पहिरो गयो भने त आउन सक्दैन नि । तर योे कुरा नबुझिकन हाम्रो राजमार्गभन्दा माथि शाखा सडकहरु यति खोलिएका छन् कि ति सडकहरुमा आएको पहिरो/भू–क्षयले गर्दा राष्ट्रिय राजमार्ग पनि जोखिममा परेको छ ।’
बिना इन्जिनियरिङ, जथाभावी स्काभेटर प्रयोग गरेर सडक नखन्न पनि सबै स्थानीय तहहरुलाई सापकोटाले आग्रह गर्नुभयो । सडक खन्नुअघि कम्तिमा एकपटक सडक विभागसँग सोध्न विभागले अनुरोध गरेको छ । आफ्नो खुशी सडक खन्ने काम बन्द हुनुपर्ने उप महानिर्देशक सापकोटाले बताउनुभयो ।
प्रकाशित मिति: शनिबार, साउन १८, २०७६, ०७:४६
