सिन्धुपाल्चोक ।
दोलखाको कालिञ्चोक तिर्थ यात्र गएर फर्केको बस सिन्धुपाल्चोकमा दुर्घटना हुँदा मृत्यु भएका १५ जना सबैको सनाखत भएको छ । हिजो साँझसम्म परिचय खुल्न नसकेका एकजनाको परिचय खुलेसँगै दुर्घटनाका सबै मृतकको सनाखत भएको हो ।
दुर्घटनामा दोलखा जिल्ला भिमेश्वर नगरपालिका–९ का वर्ष ४२ का लक्ष्मी श्रेष्ठ, रामेछाप उमाकुण्ड गाउँपालिका–४ प्रितीका वर्ष २४ का महेश तामाङ, काभ्रे बेथानचोक–५ का ३५ वर्षीय रामशरण खत्री र उहाँका श्रीमती ३५ वर्षका मैया खत्रीको मृत्यु भएको हो ।
यस्तै, लिशंखुपाखर गाउँपालिका–४ का ५३ वर्षका गंगामाया लामा, जुगल गाउँपालिका–७ याङलकोटका ७ वर्षीया सबिना तामाङ, सोही ठाउँका ३० वर्षीया रेश्मा तामाङ, १५ महिनाका रोशनी तामाङ, २८ वर्षका मञ्जु तामाङको पनि दुर्घटनामा मृत्यु भएको छ ।
जुगल गाउँपालिका ७ का सुकबहादुर तामाङ, बलेफी गाउँपालिका–५ चिम्लीङका ३७ वर्षीया फूलमाया तामाङ र दोलखा शैलुङेश्वरी गाउँपालिका फस्कुका १० वर्षीय रञ्जित बस्नेतको मृत्यु भएको प्रहरीले जानकारी दिएको छ ।
दुर्घटनामा ज्यान गुमाएकामा दोलखाको शैलुङेश्वरी गाउँपालिका फस्कुका चिनु बस्नेत, रामेछापको सुनपानी गाउँपालिका ६ का जुनुमाया तामाङ र सिन्धुपाल्चोकको इन्द्रावती गाउँपालिका १० का सुनिता तामाङ पनि रहेका इलाका प्रहरी कार्यालय बाह्रविसेका प्रहरी निरीक्षक नवराज न्यौपानेले जानकारी दिनुभयो ।
दुर्घटनाका घाइतेको धुलिखेल र काठमाडौंको अस्पतालमा उपचार भइरहेको छ । बस हिजो बिहान साढे ७ बजे लामोसाँघु – जिरी सडकखण्डको ६ किलो नजिकै सडकबाट ७० मिटर तल खसेर दुर्घटना भएको थियो ।
प्रहरीका अनुसार ब्रेक फेल भएको बस जबरजस्ती गुडाउँदा दुर्घटनामा परेको प्रारम्भीक अनुसन्धानबाट खुलेको छ ।
गत कार्तिकमा दोलखाको मागादेउरालीबाट काठमाडौंका लागि छुटेको बा २ ख ७२४५ नम्बरको बस सुनकोशी नदीमा खस्दा १७ जनाको मृत्यु भएको थियो ।
त्यसअघि गत असोजमा सिन्धुपाल्चोकको सिपाघाटबाट काठमाडौंतर्फ जाँदै गरेको बा २ ख २७१५ नम्बरको बस इन्द्रवाती गाउँपालिका १०, बडहरे झिल्के मोडमा दुर्घटना हुँदा ११ जनाको मृत्यु भएको थियो भने ४० भन्दा बढी घाइते भएका थिए ।
तीन महिनाको अवधिमा जिल्लामा ठूला तीन दुर्घटना हुँदा ठूलो मानवीय क्षति व्यहोर्नुपरेको छ ।
प्रकाशित मिति: सोमबार, मंसिर ३०, २०७६, ०८:१०
