मुगु । असारको तेस्रो हप्तासम्म खासै वर्षात् भएको छैन । रारा किनारका फूलहरु मनसुुन पर्खिरहेका छन् । फूलेका फूलहरुले राराको सुन्दरता थप खुलेको छ । कुहिरोमा लुकामारी खेल्दै पुगेका पर्यटक राराको सुन्दरतामा रमाईरहेका भेटिन्छन् ।
रारा, कर्णाली प्रदेशको प्रमूख पर्यटकीय गन्तव्य हो । राराले दिनमा तीन पटक रुप बदल्छ । विहानपख खैरो देखिने राराको रङ, दिउँसो बैजनी बन्छ । अनि साँझ पर्न थालेपछि निलो आकाश र राराको रङ उस्तै देखिन्छ ।
हिउँदमा जस्तो मुटु कमाउने जाडो छैन । सेताम्य हिउँ पनि छैन । बरु आँखै शितल बनाउने हरियाली छ । त्यही हरियालीमा टेन्ट टाँगेर बसेकाहरु भेटिन्छन् । रारा घुम्न पोखराबाट मुगु पुगेका विकेश राईलाई राराको यसका बेलाको सुन्दरताले खुब लोभ्यायो ।
रारा नजिकै दुईवटा होटल छन् । भरिभराउ होटलमा नअटेकाहरु साँझ गमगढी फर्कन्छन् । कोही बाटै तिर टेन्ट हालेर बास बस्ने मेसो मिलाउँछन् ।
मुर्माटपसम्म पुगेर रारा र वरिपरीको दृश्य हेर्न सकिन्छ । समुद्र सतहदेखि २९ सय ९० मिटर उचाइमा रहेको राराको ५ किलोमिटर लम्बाई, ३ किलोमिटर मिटर चौडाइ र १ सय ६७ मिटर गहिराइ रहेको छ ।
रारामा विश्वमा दुर्लभ असला जातका माछा, रानी ट्राउट भ्यागुतोलगायत तीन सय प्रजातिका चरा पाइन्छन् । कस्तुरी, रेडपाण्डा, मृग, घोरल, भालु, रतुवा लगायत वन्यजन्तु अवलोकनका लागि पनि रारा महत्त्वपूर्ण मानिन्छ ।
प्रकाशित मिति: आइतबार, असार २२, २०७६, १७:५१
